რწყილი და ჭიანჭველა - ხალხური ზღაპარი
ერთგული რწყილის თავგადასავალი, რომელიც მეგობარი ჭიანჭველას გადასარჩენად დაუღალავად იბრძვის. აღმოაჩინეთ მეგობრობის ძალა ამ კლასიკურ ქართულ ზღაპარში.
- ხანგრძლივობა
- მოსმენები
- 0 მოსმენა
შემსრულებელი
ანა ზამბახიძე, ანა ქურთუბაძე, გიორგი ტორიაშვილი, გიორგი ყველაშვილი, გოგა მოძმანაშვილი, ნატა ბერეჟიანი, ნინო მითაიშვილი, ალეკო ბეგალიშვილი
ზღაპრის შესახებ
ბულბულის პლატფორმაზე წარმოგიდგენთ საყვარელ ისტორიას. ეს გახლავთ ცნობილი ქართული ხალხური აუდიო ზღაპარი „რწყილი და ჭიანჭველა“, რომლის ავტორი თავად ხალხია და ის თაობიდან თაობას ზეპირად გადაეცემოდა. ოდესღაც, ძალიან დიდი ხნის წინ, რწყილი და ჭიანჭველა დაძმობილდნენ და ერთად გაუდგნენ შორ გზას. მალე ერთ პატარა რუს მიადგნენ. რწყილმა თავდაჯერებულად უთხრა ჭიანჭველას: „მე გადავხტები, მაგრამ შენ რა გეშველება?“ „განა მე ვერ გადავხტები?!“ — ამაყად უპასუხა ჭიანჭველამ. რწყილმა ისკუპა და მეორე ნაპირზე მშვიდობიანად გადახტა, ჭიანჭველამ კი ძალა ვერ მოიკრიბა, ისკუპა და პირდაპირ ცივ წყალში ჩავარდა. შეშინებულმა შეეხვეწა რწყილს: „ძმობილო, მიშველე, ნუ დამახრჩობ!“ რწყილი მაშინვე დასახმარებლად გაიქცა, ახტა, დახტა, მიირბინა ღორთან და სთხოვა: „ღორო, მომე ჯაგარი, დავგრეხ თოკსა-ბაწარსა, ჩავუგდებ და ამოვიყვან ჩემს ძმობილ ჭიანჭველასა!“ ღორმა კი უთხრა: „შენ რომ ჩემთვის რკო არ მოგიტანია.“ რწყილი არ დანებდა, ახტა, დახტა, მივიდა მუხასთან და სთხოვა: „მუხა, მომე რკო, რკოს მივუტან ღორსა, ღორი მომცემს ჯაგარსა, დავგრეხ თოკსა-ბაწარსა, ჩავუგდებ, ამოვიყვან ჩემს ძმობილს ჭიანჭველასა!“ მუხამ უპასუხა: „შენ რომ ჩემთვის ყვავი არ მოგიშორებია.“ რწყილი ახტა, დახტა, მივიდა ყვავთან და სთხოვა მუხის დატოვება, რათა მუხას რკო მიეცა. ყვავმაც თავისი პირობა წამოაყენა: „შენ რომ ჩემთვის წიწილა არ მოგიყვანია.“ გაიქცა რწყილი კრუხთან. სთხოვა წიწილა, მაგრამ კრუხმა უთხრა: „შენ რომ ჩემთვის ფეტვი არ მოგიტანია.“ ახლა ორმოსთან მიირბინა, რათა ფეტვი ეთხოვა. ორმომ მიუგო: „შენ რომ ჩემთვის თაგვი არ მოგიშორებია.“ რწყილმა თაგვს მიაკითხა და სთხოვა, ორმოს გაეცალეო, მაგრამ თაგვმა უპასუხა: „შენ რომ ჩემთვის კატა არ მოგიშორებია.“ გაიქცა რწყილი კატასთან. კატამ თქვა: „შენ რომ ჩემთვის რძე არ მოგიტანია.“ ბოლოს, დაღლილმა რწყილმა ძროხას მიაშურა: „ძროხავ, მომე რძე, რძეს მივუტან კატასა, კატა დასთმობს თაგვსა, თაგვი დასთმობს ორმოსა, ორმო მომცემს ფეტვსა, ფეტვს მივუტან კრუხსა, კრუხი მომცემს წიწილსა, წიწილს მივგვრი ყვავსა, ყვავი დასთმობს მუხასა, მუხა მომცემს რკოსა, რკოს მივუტან ღორსა, ღორი მომცემს ჯაგარსა, დავგრეხ თოკსა-ბაწარსა, ჩავუგდებ და ამოვიყვან ჩემს ძმობილ ჭიანჭველასა!“ ძროხამ კი უთხრა: „შენ რომ ჩემთვის ბალახი არ მოგიტანია!“ რწყილი მაშინვე წავიდა, დაგლიჯა მინდორში ნორჩი ბალახი და ძროხას მიუტანა. ძროხამ მადლობის ნიშნად მისცა რძე. რძე მიუტანა კატას, კატა დაეხსნა თაგვს, თაგვი დაეხსნა ორმოს, ორმომ მისცა ფეტვი, ფეტვი მიუტანა კრუხს, კრუხმა მისცა წიწილა, წიწილა მიჰგვარა ყვავს, ყვავი დაეხსნა მუხას, მუხამ მისცა რკო, რკო მიუტანა ღორს, ხოლო ღორმა მისცა ჯაგარი! გახარებულმა რწყილმა ჯაგრისგან მაგარი ბაწარი დაგრიხა და ჭიანჭველას წყალში ჩაუგდო. ჭიანჭველა თოკზე შესკუპდა. რწყილმა თოკი მაგრად გამოსწია, ძმობილი ნაპირზე გამოიყვანა და უეჭველ სიკვდილს გადაარჩინა. გახარებულმა და გადარჩენილმა მეგობრებმა თავიანთი გზა მშვიდობიანად განაგრძეს.
